生活喺外地，最興奮就係搵到家鄉嘅味道，之不過家鄉嘅味道有時都幾貴。
茂里我鍾意食卡樂B熱浪薯片，以前喺香港超市賣10蚊3包嘅，喺我住緊嘅呢條村仔竟然賣差唔多20蚊港紙一包。我見到時不知幾HIGH，唔理幾錢都照買。返到屋企就覺得好肉赤，真係大時大節我先夠膽開一包嚟食。
呢度最容易買到嘅薯片係”Lay’s”，平起上嚟可以兩三蚊加紙就買到大大包。口味有好多種而黃色原味食落同卡樂B原味都有6,7 成似。其他味就唔好講喇，一句講晒就係文化差異囉。
Lay’s 有隻BBQ味，同原味一樣叫做食得吓。我第一次食就有陣熟悉嘅感覺，但就講唔到似咩，之後就諗起好似唔辣嘅熱浪。
咁…… 將佢加辣又會唔會變成熱浪呢? 於是就衝去超市買包辣粉試吓。
呢隻BBQ味本身色水望落去就好似熱浪，加左辣粉之後真係有驚喜。
老實講，真…….真係似。
唔敢講係完全復製，但用平咁多嘅價錢整到有８、９成似仲有咩好投訴。而佢有樣比真熱浪好嘅，就係可以加辣。