就算香港即食麵嘅款式唔夠日本多，起碼出前一丁都有十幾款選擇。你地好難想像呢邊即食麵嘅選擇可以有幾少，就算係大如Walmart都唔會成日有出前一丁賣。
就算比你好彩遇到有出前一丁賣，價錢一定比香港貴。以前10蚊買到3個，呢邊麻油味要加紙個半一個，即係港紙9到10蚊。而呢度買個急凍細PIZZA只不過係3蚊，一個就夠4個人食。如果只為填飽肚你會點揀?
講到味道嘅選擇就緊係少啦! 我到目前為止只係見過麻油味同牛肉味，好間唔中先會見海鮮。想搵更多口味唯有上網，但加埋運費之後嘅價錢確實係嚇死人。
無計個喎，貴都係要食，鬼叫你思鄉咩。為左尊重每包得來不易嘅出前一丁，一定要花盡心思整到有咁好食得咁好食至得，唔係點對得住包麵。
以前煮麵係好隨意，冷水放麵、味粉一次煮就算。配料來來去去都係腸仔、餐肉甚至係”餸頭餸尾”。總之就係要快，極速醫飽肚。
話明係認真煮，緊係要上GOOGLE做吓RESEARCH。原來煮丁麵係有9廿幾種方法。
集多家意見後，以下就係我煮一丁嘅方法。
- 水滾先落麵，煮兩分鐘用筷子攪鬆
- 味粉預先放落碗
- 煮麵嘅水唔要，另外再煲水
- 滾水倒落碗與味粉撈勻，再放入麵絛，而水的分量啱啱好蓋過麵
- 最後喺麵上排好配料同落麻油
至於配料一定唔可以”求奇”，會用自製嘅日式叉燒同糖心蛋，仲有粟米粒。
排得靚靚仔仔成碗麵即刻唔同晒，中間加上蔥花真係有食拉麵嘅感覺。
一碗精心泡製嘅出前一丁絕對係要湯都飲埋，先可以大滿足。