燒味喺茂里住嘅呢條村仔係稀有嘅食物，想食叉燒係要打電話預訂，真係超乎想像!
想食叉燒我多數自己整。呢度人人屋企都有焗爐，而且整叉燒要用嘅材料都可以買到，仲有豬肉喺呢度平到你唔信，6、7十蚊就買到舊人頭咁大嘅”梅頭”。茂里諗唔到煮咩就會整叉燒做餸，加隻荷包蛋就一餐。
茂里唔敢教大家整叉燒，網上大把KOL教人整。想要整得好食都係要不斷試，反正餐餐都要自己整。整多幾次就愈來愈好味。
依家廚房有個大焗爐，其實整出嚟嘅叉燒已經係過得自己過得人，之但係D叉燒……
點都好似差咁D 柴火味。我以為因為D叉燒唔係用荔枝柴燒，用焗爐整點都唔會有柴火味。
之但又比我誤打誤撞試到個新煮法。
有次茂里整完叉燒先發覺無蜜糖，出去買又要揸車，於是就用楓糖漿頂住先。
點知就發現新大陸。
原來楓糖漿有蜜糖無嘅楓樹味，搽喺焗到燶燶地嘅叉燒就產生柴火味。
以前喺香港從未食過楓糖漿，但呢度楓糖漿係好普遍。我就間唔時用嚟食熱香餅，從無諗過可以用嚟煮中餐。
半肥瘦、燶邊加埋柴火已經好接近我心目中嘅完美叉燒。再加埋白飯、荷包蛋同甜豉油，
真係好黯然、好銷魂。
下次茂里發現楓糖漿有咩新食法，再喺呢度同大家分享。