茂里一家都鍾情於日系嘅菜式。個人認為佢比中菜容易整，因為平時用到嘅調味料都係醬油、味琳同料理酒。相對較易HANDLE，失敗率都比較低。
嚟到加拿大一日3餐都要自己煮，如果有樣調味料可以做到多幾樣嘢你話幾無得頂呢!
好彩喺茂里嚟到之前就有港人喺呢度開左間日系スーパー，到步第一件事就係去入貨。
老闆娘見我茂里都鍾意煮日本嘢，就介紹左
“白だし”
比我認識，讀音係”shiradashi” 。
老闆娘話呢支嘢可以用嚟整好多嘢。
如果你上GOOGLE搜尋”白だし”，台灣會叫佢做”白湯頭”。裡面其實係用昆布、柴魚、小魚乾等食材熬煮而成，仲已經加埋醬油、味醂、砂糖。可以話係濃縮左嘅日式湯頭。特點係柴魚味比較突出且不死鹹，用嘅時候只要稀釋就得。
用左”白だし”你就唔使每次自己用柴魚粉、醬油、味琳同料理酒去溝汁。
茂里形容佢係日式料理嘅萬能俠絕對無跨大。
用佢輕輕鬆鬆就整到冷熱嘅蕎麥麵同烏冬、玉子燒、馬鈴薯燉肉、日式涮涮鍋的湯底、茶碗蒸、日式卷蛋、關東煮、親子丼等家常日本料理。
再簡單D嘅，可以用佢嚟浸糖心蛋。只要浸一晚就非常入味，拍得住拉麵店整嘅有餘。
浸完蛋嘅”白だし可以用嚟煮白蘿蔔，同樣簡單之餘更充滿日本風情。