喺外國，麵包必然係主食。所以入到超市，麵包嘅種類比米多是常識吧。唔計新鮮出爐嘅，剩係方包都足足擺滿幾個貨架。
雖然我仲未進化到餐餐食麵包，但一個星期都會有幾日食麵包做早餐或下午茶。
咁多種，點揀?
緊係𡃶住個荷包先，專揀減價貨買。麵包嘅嘢，茂里真係唔識。食落隻隻差唔多。
不過有隻有個女仔LOGO嘅麵包就長期賣5個幾一包，一般麵包都係兩、三蚊，咁貴點會買。
直到有次見到佢減到3個零。噢! 原來就過期所以賣大包。計過條數一人一日食一個，到期前應該可以KO佢。
嗰隻係一包有10個嘅 La Fournee Doree Brioche Milk Rolls，食落甜甜地，唔查嘢斎食都好食。叮一叮直情有新鮮出爐麵包嘅FEELING。
之後試到一隻味仲開心，包裝名係Mini Brioche x12。開心唔係因為佢一包12個，而係食落竟然同以前食開嘅排房跟湯個包一樣味道。
以前提起鋸排、茂里嘅至愛唔係花園就係金鳳。雖然今時今日食唔到佢地嘅鐡板，有個包加埋個罐頭紅湯或白湯都止到吓咳。
試左兩隻味都知呢次入坑，之後食埋佢嘅方包、漢堡包同bagels都係水準之作。
點知食埋個CROISSANT BUN，我地一家比呢條法國妹徹底征服。放入焗爐叮一叮真係好食到爆粗。
咁好食嘅包，緊係要上網CHECK一CHECK咩料。
佢個網www.lafourneedoree.fr入面全部係法文，好彩呢個世界有GOOGLE TRANSALTE。原來呢間係家族經營嘅生意，而且已經傳到第4代。而用GOOGLE MAP就搵到佢地喺法國位於南特南邊嘅廠房，剩係門口車位都有幾百個，個廠應該都唔細。
講返產品先。
品牌下面有差唔多有30種。簡單地可以用甜、鹹去分。複雜D可以用幾時食、配咩食去分，非常講究。
可惜我呢度只係得嗰4、5種。好想試吓佢D牛角包、MUFFIN、仲有奶油蛋糕。
唔通真係要走一轉法國?