依家咩嘢加價都話同打仗有關，之前茂里提過嘅Ichiban Sapporo都跟住其他嘢加價，一加就係1毫2。作為無收入人士，呢1毫2真係好重皮。
油貴最多揸少D車，但係你點都要食，唯有搵吓有無其他平嘅。
茂里一直都好努力咁搵一D熟悉嘅味道，而似曾相識嘅味道一定唔可以唔提福字麵。今次就比我搵到呢隻”沙話Dee給”福麵，仲要係兩個半就有5包。
包裝用嘅顏色好搶眼，一睇就知係泰國嘢。包裝右上角寫住MAMA，上網CHECK係泰國嘅食品公司，可能以前香港都有得賣，只不過以前大多選擇而且有得揀多數都會買日本嘢。
佢呢隻Thai Chef series 應該有5隻味。分別係雞、咖哩雞、蝦、冬陰蝦、同鴨。而我呢度就只有雞同冬陰蝦賣。
打開包裝見到麵本身已炸至金黃色，就咁食都可以。食落同福麵味道差唔多，非常香口，大家可以將成包麵壓碎撈味粉食。呢個食法應該係唔少人嘅童年回憶
煮熟左嘅麵質及味道一樣同福麵好似。同福麵唔同係跟麵除左有味粉外，仲會有包油，而冬陰蝦味仲會有包辣椒粉。
本身兩包麵跟嘅味粉同福麵一樣係雞湯味，果大家純粹係想回味家鄉嘅味道，可以只落味粉，食落真係有9成似。
而落埋包油就會令味道改變。而冬陰蝦包油一落左即時令碗麵散發一陣陣冬陰功湯嘅酸辣味，食落非常有驚喜。反而雞味落埋包油都唔係好大分別。
一包5毫字嘅即食麵可以有幾種食法，CP值爆燈啦。希望超市KEEP住入貨之餘最好入埋其餘3隻味就GOOD喇。